Mag-inang tulak, nadakma

TIMBOG ang mag-ina na sinasabing tulak matapos magsagawa ng buy-bust operation sa Bgy. Tejeros Convention, Rosario, Cavite, kamaka­lawa ng hapon.

Kinilala ni Police Supt. Paul Bometivo, ang suspek na si Jeffrey Terrago alyas Dagul, 32, at ang ina nito na si Jannylyn Terrago, 53, kapwa residente ng Bgy. Tejeros Convention, Rosario at kapwa nasa drug watchlist ng pulisya.

Sa panayam kay Col Bometivo, alas-2:00 ng hapon nang kanilang ilatag ang buy-bust operation laban sa mag-ina.

Isang pulis ang tumayong scorer at bumili ng shabu sa mga suspek.

Habang isinasagawa ang transaksiyon ay nakamasid naman sa paligid ang ilang miyembro ng PDEA 4A at Drugs Enforcement Unit (SDEU) ng Gen. Trias Police at nang magkaabutan na ay dito na dinakma ang mag-ina.

Nakuhanan ang mga ito ng higit 10 gramo ng shabu at drug money.