BLUE EAGLES, KAMPEON KONTRA GREEN LANCERS SA PRESIDENT’S CUP

NAKUHA ng Ateneo de Manila University ang kanilang ikalawang kampeonato sa loob ng tatlong araw matapos nilang talunin ang University of the Visayas, 95-71, para sa Philippine Collegiate Champions League President’s Cup Lunes sa FilOil Flying V Centre. Lamang at kontrolado ang buong 40 minutos ng UAAP champion Blue Eagles kontra sa CeSAFI champion Green Lancers.

Itinanghal si George Isaac Go bilang Most Valuable Player sa bisa ng kanyang 15 puntos. Ipinasok ni Go ang unang 7 puntos ng laro – isang 4-point play at isang tres – hindi na nakaporma ang UV.

Mula roon, unti-unting lumayo ang Ateneo sa likod nina Bryan Andrade, Thirdy Ravena at RV Berjay. Lahat ng ipinasok ni PCCL Best Coach Tab Baldwin, pati ang mga bagong dumating noong 4th quarter na sina Matthew Nieto, Tyler Tio at Mike Nieto na nagtayo ng kanilang pinakamalaking kalamangan, 84-51.

“We achieved a lot this year and we are looking forward to next year so it’s nice to cap it off with a couple of wins,” wika ni Coach Baldwin. “This validates the program we are building and these are the nicest trophies that I have seen.”

Sinamahan si Go sa Mythical 5 nina Andrade na gumawa ng 13 puntos at Ravena na may 12 puntos. Sina Rey Anthony Suerte at Bassieru Sackor ng UV ang bumuo sa lima.

Namuno si Suerte sa Lancers na may 26 points, karamihan sa 2nd half matapos depensahan nang mabuti noong first half. Sumunod ang tubong Liberia na si Sackor na may 16 puntos at 12 rebound.