Word war, non-stop | PALASYO SA SIMBAHAN: ‘WAG NANG EPAL

UMAPELA kahapon ang Malacañang sa Simba­hang-Katolika na huwag nang makialam sa estado matapos ang magkakasunod na patut­sada ng mga Obispo laban kay Pangulong Rodri­go Du­terte.

Naniniwala ang Palasyo na malaya ang mga Obispo na magpahayag ng kanilang sariling pananaw ngunit, iwasan ang pagpuna laban sa gobyerno.

“Ang sinasabi lang na­ming, if you are men of the cloth, ang talagang trabaho mo ay spiritual awakening sa faithful. Huwag mo nang pakialaman ang estado with respect doon sa mga me­thod na ginagawa ng estado na sa kabutihan naman ng ba­yan,” pahayag ni Presi­den­tial Spokesman Salvador Panelo.

“Now, if they are affec­ted by the criticism on the hy­pocrisy of certain mem­bers, if they are not alluded to, if they are not embraced in that group, then why should they be reacting?” ani Panelo.

Una nang binatikos ng tatlong Obispo sa publiko ang pangulo makaraang hi­mukin na patayin at holda­pin ng mga tambay ang mga mayayamang Obispo.

Matatandaang, sinabi ni Balanga Bishop Ruperto Santos na ang panguluhan ni Duterte ay isang kahihiyan sa bansa, habang si Nova­li­ches Bishop Emeritus Teo­doro Bacani ay hinamon ang pangulo na maglibot sa mga lansangan na walang escort.

Ang pinakahuling bati­kos kay Duterte ay mula kay Lingayen-Dagupan Arch­bishop Socrates Ville­gas, na nagsabi na mas nag-aalala siya para sa pangulo kaysa sa Simbahan.