Sa ngayon, dasal at nobena pa lang ang panlaban sa pork barrel na kanser sa lipunan

KA AMBO / BISTADO

AKTUWAL nang nararamdaman ang pagbabago sa kapaligiran.

Pero, hindi pa rin malinaw kung bababa pa ang presyo ng mga bilihin!

◘◘◘

Batay sa pahayag ng mga eksperto, imbes na bumaba, lalo pang tataas ang presyo ng mga produkto at serbisyo.

Apektado ang krisis sa trade war na idineklara ng U.S. at China na inaasahang lalo pang titindi sa mga susunod na buwan!

◘◘◘

Ang Pilipinas ay isa sa collateral damage sa naturang trade war.

Pero, maging ang presyo ng petrolyo sa World Market ay tumataas at ang halaga ng piso kontra dolyar ay buma­bag­sak!

◘◘◘

Pinatitindi ang krisis sa ipina­tutupad na TRAIN Law kung saan pinapasan ang mataas na buwis na ipinapatong sa mga produkto.

Walang linaw kung paano mare­resolba ang krisis na ina­asa­hang magiging malala saka­ling ipatupad ang TRAIN Law 2 na magpapataw pa rin ng karag­dagang buwis!

◘◘◘

Ang problema, wala rin linaw o garantiya na ang buwis at taripa na ipinapataw ay magaga­mit nang maayos sa mga programa at proyekto.

Patuloy pa rin ang pagkakamal ng salapi ng mga opisyal ng gobyerno sapagkat nananatiling nakasi­ngit sa annual budget ang pesteng pork barrel!

◘◘◘

Ang pork barrel ay tradisyunal na pinagmumulan ng kurakot o tongpats ng mga mambabatas at ehekutibo.

Ibinibigay kasi sa mga eheku­tibo at mambabatas ang diskres­yon kung ano ang espesipikong proyekto at kontraktor na siyang sanhi ng overpricing, ghost project at tongpats!

◘◘◘

Ang iskemang ito ay kinukunsinte ng burukrasya kabilang ang Hudikatura, Lehislatura, Commission on Audit, Ombudsman at Civil Service Commission.

Bigo ang Konstitusyon na mapi­gil ang iskema ng pork barrel sapagkat kinukunsinte ito mismo ng Malacañang na ginagamit ang iskema upang madiktahan ang desisyon ng Kongreso!

◘◘◘

Hindi ito ngayon lamang nagaga­nap, bagkus ito ay kanser sa lipunan na nakabaon sa sistema ng demokrati­kong institusyon sa bansa mula nang ito ay maging Republika.

Sa ngayon, wala pang solusyon maliban ang magdasal at mag­nobena!