Pagbibigay ng libreng college subsidy sa mga naka-enroll sa private school, aprub!

KUYA WIN GATCHALIAN / WIN TAYO SA EDUKASYON

HINDI kaila ang pagkasabik ng mga college student at kanilang mga magulang mula nang mabalitaan na tuloy na tuloy na ang implemen­tas­yon ng Tertiary Education Subsidy (TES) na mapakikinabangan ng mga estudyante mula sa mga pampribado at pampublikong paaralan sa buong bansa.

Aprubado na ang TES sa mag-aaral ng 412 private schools mula sa Luzon, habang 380 private schools naman sa Visayas at Mindanao. Inanunsiyo ito ni Commission on Higher Edu­cation (CHEd) Chairman Prospero de Vera III, ilang linggo pa lang bago matapos ang nagda­ang taon kung saan pumirma ito ng kasunduan kasama ang private Higher Education Institu­tions (HEIs) sa pamamagitan ng Unified Student Financial Assistance System for Tertiary Edu­cation Act (UniFAST).

Nakalaan at nakadisenyo ang TES para sa mga estudyanteng naka-enroll sa anumang HEIs, gayundin sa State Universities and Col­leges (SUCs), Local Universities and Colleges (LUCs) at Technical-Vocational Institutions (TVIs) na makatatanggap ng P60, 000 kada taon para sa kanilang tuition at miscellaneous fees.

Nakatutuwang malaman na sa wakas ay na­isakatuparan na rin ang pagbibigay ng gobyer­no ng libreng college subsidy hindi lamang para sa kabataang nag-aaral sa public schools kundi maging sa mga naka-enroll sa private schools.

Naalala natin ang mga nakaraang buwan noong napabilang at nasaksihan ng inyong ling­­kod ang pagsasagawa ng serye ng Na­tion­wide Information Caravan ng CHED upang lubos na mahimay ang mga nilalaman ng Re­public Act 10931 o ang Universal Access to Quality Tertiary Education Act at matugunan ang mga tanong at concern ng iba’t ibang edu­cation institutions.

Mula sa 300,000 beneficiaries na nakalaan sa 2018 General Appropriations Act kung saan P16 bilyong pondo ang nakalaan, 13,760 nito ay mga scholar mula sa Expanded Students’ Grants-in-Aid Program for Poverty Alleviation (ESGP-PA) sa ilalim ng pangangasiwa ng De­partment of Social Welfare and Development (DSWD). Sila ang mga batang kapus-palad na kabilang sa indigent families na benepisaryo ng Pantawid Pamilyang Pilipino Program ng DSWD na marurunong at responsable sa kani­lang pag-aaral.

Ayon kay Chairman De Vera, inaasahan na magkakaroon pa ng 100,000 karagdagang bilang ng mga mag-aaral ang makikinabang sa papa­rating na school year.

Kabilang ang mga sumusunod sa sakop ng miscellaneous fees: Admission, handbook, athle­tic, laboratory, computer, library, cultural, medical at dental, development, registration, en­trance, school ID, guidance fees at iba pang katulad na bayarin.

Nagsisilbing biyaya para sa atin itong pag­susulong ng libreng edukasyon dahil ibinuhos natin ang lahat ng ating makakaya para maisa­katuparan ang hangad na maiangat ang kalidad ng edukasyon sa kolehiyo. Ngunit siyempre, hi­git na mas makabuluhan ito para sa mga ma­gulang na ang ultimong pangarap para sa anak ay makapagtapos sila ng pag-aaral. Priceless, ‘ika nga nila, ang bagay na ito.

Dumaan man sa butas ng karayom ang pro­seso nito, nagpapasalamat tayo na natutukan nang maigi ng mga kinauukulan ang pagpapatu­pad ng programa. Masasabing sulit ang lahat ng ating pananaliksik, pagsisiyasat at pag-aaral para sa makasaysayang batas na ito. Sa ating mga mag-aaral at kanilang mga magulang, sana ay masulit ang inyong edukasyon!