Davao Oriental niyanig ng magnitude 6
NIYANIG ng Magnitude 6 na lindol ang Davao Oriental at naitala ang mataas na intensity sa ilang lugar sa Mindanao, kahapon.
Natunton ng Philippine Institute of Volcanology (Phivolcs) ang sentro ng pagyanig sa layong 117 kilometro ng Governor Generoso ng nasabing lalawigan alas-4:03 ng madaling-araw.
May lalim na 40 kilometro ang lindol na tectonic ang origin.
Naitala ang Intensity IV sa Davao City; Mati City; San Josefa, Agusan del Sur; Intensity III sa Digos City; Alabel at Malungon, Sarangani; Manay, Davao Oriental; Prosperidad, Agusan del Sur; Intensity II sa General Santos City; Tupi, South Cotabato; Glan, Kiamba at Malapatan, Sarangani; Makilala, Cotabato at Intensity I sa Gingoog City.
Kung pagbabatayan naman ang instrumental intensities ay naitala ng Phivolcs ang Intensity III sa Alabel, Sarangani; Intensity II sa General Santos City; Tupi, South Cotabato; Kiamba, Sarangani; Kidapawan City; Davao City; Gingoog City at Intensity I sa Cebu City; T’boli, South Cotabato.
Walang inaasahang pinsala ang naturang lindol ngunit, inaasahan pa rin ang aftershocks.
Comments