2ND ACTION SA PHL CUP: ELITE, BATANG PIER, FUELS AT BOLTS

MATAPOS talunin ng Barangay Ginebra ang mortal na karibal na Talk ‘N Text sa inaugural game sa Philippine Arena, ang Blackwater Elite, North Port Batang Pier, Phoenix Fuel Masters at Meralco Bolts ang magpapasiklaban sa ikalawang action day sa Philippine Cup ngayon sa Araneta Coliseum.

Magsasagupa ang Elite at Batang Pier sa unang laro ng 4:30 p.m. na susundan nang bakbakan ng Fuel Masters at Bolts ng 7 p.m. Inaasahang magiging kapanapanabik ang dalawang laro dahil halos magkakapantay ang lakas ng apat na koponan depende na lang sa performance ng players at diskarte ng coach.

Sina Blackwater Elite coach Bong Ramos at North Port mentor Pido Jarencio at Phoenix bench strategist Louie Alas at Meralco drill master Norman Black ay magtatagisan katuwang ang kanilang assistant coaches.

Uumpisahan ng Beermen ang kanilang title retention campaign kontra rejuvenated at energized na Columbian Dyip sa Biyernes sa Cuneta Astrodome, bago ang salpukan ng Rain or Shine at NLEX. Kinuha ng Columbian Dyip si top rookie CJ Perez at apat na bagito para palakasin ang kampanya at alisin ang tag “tail-ender” kung saan tumapos ang Car Assemblers ng 1-10 isang panalo kontra Rain or Shine.

Pangungunahan ang opensiba ng Bolts nina Chris Newsome, Reynel Hugnatan, Jeff Hodge, Amer Baser at Jared Dillinger kontra sa Fuels sa pangunguna nina dating Aces players Calvin Abueva, Matthew Wright, JC Intal, Dough Kramer, at James Wilson. ”We have to win our first game to bolster our title campaign,” sabi ni coach Black na hanggang ngayon ay bigo pa ring bigyan ng titulo ang team. (Clyde Mariano/ATD)