BULLPUPS, SOLO LEAD NA, SINAKMAL ANG BLUE EAGLETS SA UAAP JUNIORS

NAKALUSOT ang National University sa ginawang paghahabol ng Ateneo de Manila sa 4th period upang maitakas ang 78-71 panalo at patatagin ang solong pamumuno sa UAAP Season 81 juniors basketball tournament sa FilOil Flying V Centre sa San Juan.

Kapwa umiskor ng tig-16 puntos sina Gerry Abadiano at Terrence Fortea para pangunahan ang panalo ng Bullpups.

Ngunit, ang talagang nagsalba sa NU ay ang three-point play ni Carl Tamayo sa nalalabing 46.3 segundo na naging susi sa 7th win nila kontra isang talo.

Nanguna sa Ateneo na bumaba sa markang 6-2, panalo-talo si Kai Sotto, ang leading season MVP contender na may 22 puntos, 18 boards, 5 assists at 3 blocks. Nauna rito, nanatili ang FEU-Diliman sa 2nd place matapos igupo ang dating katablang Adamson U, 80-72. (VA)