‘Di nakuntento sa panunukso, ginulpi | 11-ANYOS PATAY SA 3 BULLY

DEDO ang 11-anyos na lalaki na umano’y tampulan ng tukso, makaraang bug­bugin ng kanyang tatlong kalaro sa Mangaldan, Panga­sinan.

Napag-alaman sa report ng Mangaldan police mula sa salaysay ng ama ng bik­tima, pinagtulungan uma­nong bugbugin ang kanyang anak ng mga ka­laro nito noong Disyembre 29, ha­bang idinaraos ang ka­nilang Christmas Party.

Sapilitan umanong dinala ng ibang mga bata ang bik­tima sa isang madilim na lu­gar kung saan siya pinagtu­lungang bugbugin.

Sinubukan umanong ita­go ng biktima ang insidente sa kanyang magulang dahil sa takot umano nitong ba­likan ng kanyang ama ang mga naging kaaway.

Nitong Enero 1 lamang nagkaroon ng lagnat na may kasamang pananakit ng ka­tawan ang biktima na tuma­gal ng mahigit isang linggo.

Nang isugod sa ospital ang bata nitong Martes, dito na siya binawian ng buhay.

Patuloy namang nagsa­sagawa ng imbestigasyon ang mga awtoridad tungkol sa insidente habang nakipag-ugnayan naman ang pamilya sa Municipal Social Welfare Department dahil pawang mga menor-de-edad ang mga sangkot.