Tserman at tanod sapol din | SUNDALO PINAGBABARIL SA LAMAY, PATAY

PATAY ang isang sundalo habang sugatan ang kapitan ng barangay at kanyang tanod matapos silang pagbabarilin ng grupo ng kalalakihan sa Camarines Sur.

Nakilala ang nasawi na si Sgt. Benito Ronquillo Bien, 45, miyembro ng Philippine Army at nakadestino sa Bgy. Bicalen, Presentacion.

Nasa ligtas nang kalagayan sina Tonyben Tabalde, kapitan ng Bgy. Sagrada at tanod na si Mario Ibanita.

Sa inisyal na imbestigasyon, nangyari ang insidente habang nag-iinuman sa lamay ang tatlo sa Sitio Rakitan, Bgy. Dela Fe.

Bigla umanong dumating sa lugar ang ilang hindi pa tukoy na mga lalaki at pinagbabaril ang sundalo kung saan tinamaan din ang kapitan at tanod.

Patuloy pa ang imbestigasyon sa insidente at hindi iniaalis ang NPA bilang isa sa mga nasa likod ng krimen.