NM DATU, GM LAYLO AT ABELGAS MGA NAGHARI SA PAMPANGA OPEN

NANGHIYA ng mga dekalibreng chessers si National Master Alcon John Datu kasama na si Grandmaster Dar­­win Laylo at FIDE Master Roel Abelgas upang koronahan ang sarili niya bilang hari ng Pam­panga Open Chess Tournament sa Marque Mall ng Angeles City.

Halos perpekto ang mga naging kilos ni Datu, 25-anyos at may 2330 na rating sa pananagasa niya hindi lang kina Laylo noong round 6 at kay Abelgas sa bakba­kan sa round 7 kundi pati na rin kina Jerico Santiagel (round 1), Ronald Hermida (round 2), Woman International Master Kylen Joy Mordido (round 3), Jerry Areque (round 4), Darry Bernardo (round 5) at Kevin Arquero (round 8).

Sa huling yugto ng kompetisyon, sigurado na sa titulo si Datu kahit matalo pa pero humirit pa rin siya ng pakikipag­hatian ng puntos laban kay Hart Len­non Salgados para makali­kom ng kabuuang 8.5 puntos mula sa 9 rounds at maiposte ang runaway na panalo.

Nakaipon sina Laylo at Abelgas ng tig-pipitong puntos kasama sina Chiu Chin Samson Lim, NM Nelson Villanueva, International Master Ronald Dab­leo, Don Tyrone Delos San­tos, Istraelito Rilloraza, Salgados at Antonio Almo­dial III pero dahil sa mas mataas na tiebreak points ay sina Laylo at Abelgas ang umokupa ng natitirang mga upuan sa podium.

Saman­tala, paninilat din ang naging tema ng kom­petisyon sa Jardin Del Roca Blitz Tournament sa Toril, Davao City ma­tapos masi­ngitan ni National Master Jo­nathan Tan ang mga pabo­ritong sina IM John Marvin Miciano at FM Austin Jacob Literatus upang maita­kas ang korona ng Jardin Del Roca Blitz Tournament sa Toril, Davao City.