Permanenteng evacuation centers, aprub!
KASUNOD ng pananalasa ng Bagyong Usman, nananatili pa rin sa mga evacuation center ang mga pamilyang naapektuhan nito.
Tuwing may bagyo o iba pang kalamidad, kadalasang nagsisilbing masisilungan ang mga paaralan at iba pang pampublikong establisimyento.
Kaugnay nito, muling iginiit ang pagpapatayo ng permanenteng evacuation centers upang hindi na magamit ang mga eskuwelahan at nang hindi maabala ang klase.
Kaya sa panukalang 2019 National Budget, kabilang sa alokasyon ang P2.1 bilyon para sa konstruksiyon ng permanent evacuation centers.
Sa pamamagitan nito, mas madali na para sa lahat kung saan pupunta sa oras ng kalamidad. Hindi na magsisiksikan sa mga classroom at kahit paano ay magiging komportable ang mga nagsisilikas, lalo na ang mga bata.
Kung wala tayong magawa sa pagdating ng mga sakuna, gamitin natin ang lahat ng pagkakataon para maharap ito nang hindi napapahamak.
Panawagan naman natin sa ahensiyang mangangasiwa sa pagpapatayo ng mga evacuation center, bantayan nating maigi ang proyekto.
Siguruhin nating magagamit nang tama ang budget, maitatayo ang mga permanenteng evacuation center nang matibay.
Comments