Mga pasahero ng bus, dinale 5 MIYEMBRO NG IPIT GANG, ARESTADO

HULI ang limang miyembro ng Ipit Gang matapos mambiktima ng ilang pasahero sa loob ng bus sa Makati City.

Kinilala ang mga hinuling suspek na sina Romero Flores, Ramil Bitoy, John Paul Perez, Roel Justan at Richie Reyes.

Ayon sa ulat ng Makati City Police, naganap ang insidente sa loob ng Jasper Jean Bus, na may Body # 81037 sa harapan ng gas station na matatagpuan sa panulukan ng EDSA at Buendia Avenue, Bgy. Bel-Air sa nasabing lungsod, alas-10:45 ng gabi.

Galing ang bus sa Ortigas, habang sakay ang mga biktima at binabagtas ang naturang lugar nang mapansin nilang nawawala na ang kanilang mga cellphone.

Agad nilang ipinatigil ang bus sa nasabing lugar at humingi ng tulong sa mga namataang nagpapatrulyang pulis na ikinadakip ng limang suspek sa loob ng bus at nasamsam sa mga ito ang walong cellphones.