Criminology student na holdaper-karnaper, kulong

ARESTADO ang 19-anyos na Criminology stu­dent na sangkot umano sa pagnanakaw sa dalawang menor-de-edad ng motor­siklo, gadgets at cash habang nakatakas naman ang ka­sab­wat nito sa Valenzuela City.

Kinilala ni Valenzuela Po­lice Chief Senior Supt. David Nicolas Poklay ang naares­tong suspek na si An­gelo Cuabo, ng Bgy. Potrero, Ma­labon City habang pinag­ha­hanap si Harvey Soriano ng Bagong Barrio, Caloocan City.

Ayon kina PO3 Jennifer delas Nadas at PO2 Ana Grace Mendoza, alas-12:30 ng hatinggabi, sakay ang da­lawang menor-de-edad na mga biktima sa isang Mio 125 motorcycle habang ti­natahak ang kahabaan ng MacArthur Highway nang harangin ng mga suspek sa Bgy. Dalandanan.

Sapilitang inagaw ng mga suspek sa mga biktima ang motorsiklo at kinuha ang ka­nilang cellphone, power bank, vape at P2,500 cash bago tu­makas patungong Caloo­can City.

Humingi naman ng tu­long ang mga biktima sa pulisya na agad nagsagawa ng follow-up operation na nagresulta sa pagkakaaresto kay Cuabo sa kahabaan ng Gen. Tinio St., Morning Breeze, Caloocan City habang naka­ta­kas naman si Soriano.

Sinabi ni Sr. Supt. Pok­lay na narekober ng pulisya ang motorsiklo at iba pang per­sonal na gamit ng mga bik­tima.