5 yrs. old kinidnap, ginang huli

KASONG kidnapping ang isinampa laban sa 39-anyos na ginang na sinasa­bing dumukot sa 5-taong gulang na babae sa Cubao, Quezon City noong Enero 1.

Ayon kay QCPD Director, PC/Supt. Joselito Esquivel, Jr., paglabag sa RA 7610 (Protection Against Child Abuse, Exploitation and Discrimination) ang kinahaharap na kaso ni Amalia Bonete, residente ng Tala, Caloocan City.

Sa ulat ng QCPD, alas-10:10 ng gabi noong Enero 1, nang ini-report ni Herminia Manalo-Tendaoco, 29, ng Sariaya, Quezon sa Cubao Police Station-7 na bigla na lamang nawala ang kanyang anak ala-1:00 ng hapon sa Bgy. E. Rodriguez, Cubao.

Agad na kumuha ng CCTV footage ang pulisya sa nasabing lugar at doon nakita ang ginang na akay-akay nito ang bata habang naglalakad sa sidewalk.

Agad namang nakatanggap ng impor­masyon alas-6:30 ng hapon ng Enero 3, si SPO1 Wency dela Cruz ng Caloocan City Police Station at ipinagbigay-alam kung saan matatagpuan ang nawawalang bata.

Rito na rumesponde ang Caloocan police at nabawi ang bata saka itinurnover sa Cubao Police Station.

Mariin namang pinabulaanan ng ginang na kinidnap nito ang bata at sinabing kaya niya dinala sa kanilang bahay ang bata dahil anak umano ito ng kanyang kaibigan na nakatira sa Quiapo, Manila.