Sa kabila ng mga suliraning kinaharap ng bansa, mga Pinoy, nananatiling positibo ngayong 2019!
BAGONG TAON, bagong kabanata ng buhay at pag-asa, ito ang dapat isabuhay ng lahat ng mamamayan ngayong 2019.
Kaya magandang balita na sa survey ng Social Weather Stations hinggil sa pananaw ng mamamayan tungkol sa pagpapalit ng taon, 92 porsiyento ng mga Pilipino ang nagsabi na sasalubungin nila ito nang may pag-asa.
Matatandaang, noong 2018, kaliwa’t kanan ang mga krimen, kalamidad, suliraning kinaharap ng bansa tulad ng sunud-sunod na pagtaas ng presyo ng mga bilihin sa merkado, gayundin ng petrolyo, kakulangan sa suplay ng bigas at marami pang iba, pero nakatutuwa na tayong mga Pilipino ay pinipili pa ring magkaroon ng bagong pag-asa para maiayos pa ang ating buhay, gayundin ang ekonomiya ng ating bansa.
Gayunman, ikinatuwa rin ng pamahalaan ang resultang ito kung saan ayon kay Presidential Spokesperson Salvador Panelo, sa pagiging optimistic ng mga Pinoy, naniniwala siya na walang epekto sa nakararami ang pambabatikos at negatibong kritisismo sa administrasyong Duterte.
Samantala, kaybilis ng panahon, nagpalit na naman ang taon, pero ang hiling natin ngayon ay manatili sana ang positibong pananaw na ito na makapagbibigay ng magandang epekto hindi lang sa ating buhay kundi maging sa ating bayan.
‘Ika nga, kasabay ng Bagong Taon ay kailangan na rin tayong magbagong-buhay kung saan kailangan nating umpisahan na mas maging produktibo tayo sa bawat araw gayundin, paigtingin ang respeto at displina ng bawat isa.
Maniwala at manalig lamang tayo na ngayong 2019, mas maraming biyaya at magandang balita ang ating matatanggap, iwanan na natin ang mga hindi magagandang pangyayari noong nakaraang taon.
Manigong Bagong Taon, mga ka-BULGAR!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments