“MAGTATAGO NA AKO KUNG MABIBIGO ANG ATLETA SA PHL SEAG”- MONSOUR

SIMULA sa susunod na taon, regular na makikipag­pulong si Chief of Mission Monsour del Rosario sa National Sports Association leaders at coaches upang alamin ang paghahanda ng mga atleta na sasabak sa 2019 Southeast Asian Games na idaraos sa bansa kung saan muling naman mapapalaban ang mga Pinoy sa mga atle­tang mula sa 11 bansa na nakalaban noong 2017 sa Malaysia.

“Bilang Chief of Mission tungkulin kong makakipag-ugnayan sa mga NSA lea­ders at coaches tungkol sa ginagawang preparasyon ng kanilang mga atleta at sigu­raduhing seryoso ang kani­lang paghahanda. Ganito rin ang ginawa ko sa naka­raang Asian Indoor Games at Martial Arts sa Turkme­nistan,” sabi ni Del Rosario sa eksklusibong panayam sa kanya bago ang Christmas break. Si gymnastic presi­dent Cynthia Carrion ang nag­silbing delegation head sa 2017 SEA Games sa Ma­lay­sia kung saan nakakuha ang mga Pinoy ng 30 gold medals.

Mahirap daw ayon kay del Rosario ang kanyang tungkulin bilang delegation head. Nasa responsibilidad niya ang lahat at kailangan niyang gampanan. “Kung kinakailangan ay pupunta­han ko ang bawat NSA at ala­min ang dapat na pag­hahanda ng kanilang mga atleta,” paliwanag ni Del Rosario.

Sinabi ni Del Rosario na malaking kahihiyan kung mabigo ang mga atleta sa kanyang pangangalaga bilang delegation head lalu na at sa ‘Pinas gagawin ang SEA Games lalo na at panonoorin ng mga Pinoy sa sports com­plex na pagdarausan at ang iba pa sa iba’t ibang channel ng telebisyon. “Mag­tatago na ako kung mabibigo ang ating mga atleta,” pabirong sabi ng taekwondo expert turned politician. Makiki­pagpulong din si Del Rosa­rio kay PSC Chairman Wi­lliam Ramirez upang maba­langkas ang mahahalagang bagay na may kinalaman sa SEAG.