Kapakinabangan ng school gardening para sa estudyante, ayos!

KUYA WIN GATCHALIAN / WIN TAYONG LAHAT

KUMUSTA ang inyong Pasko, mga suking tagasubaybay ng BULGAR? Sana, naging masaya tayo.

Kaya sa mga natitira pang araw ng bakas­yon, gawin itong produktibo sa ating mga tahanan tulad ng pagpapalaganap ng school gardening para sa ating mga estudyante sa elementarya at high school.

Ang edukasyon ay hindi lamang naka­pokus sa pagiging mahusay sa akademiko. Para sa mga mag-aaral, mas nagiging ma­kabuluhan ang pag-aaral nila kapag may kahalong sari-saring hands-on activities.

May hatid kasing saya at excitement ang pisikal na mga aktibidad dahil sa halip na nakatutok lamang sila sa libro at blackboard, malaya rin silang natututo sa labas ng klasrum.

Ang pagkakaroon ng school garden ay lumago at lumawak noong ika-20 siglo dahil sa kakulangan ng pagkain dulot ng World War I at II. Nagsimula ang aksiyong ito noong 1890s sa Europe at nadala sa Estados Unidos.

Ngunit, sa paglipas ng panahon, natutok ang pananaw ng tao sa teknolohiya at naka­ligtaan na gawing pokus at isama sa kuriku­lum sa mga eskuwelahan ang paghahardin, ayon sa California School Garden Network.

Ayon sa ating mga beteranong guro, ang interes sa paghahardin sa loob ng paaralan ay muling sumigla noong 1970, lalo na sa Pili­pinas dahil sa pagkilos ng ating pamahalaan pati na ang mga grupong maka-kalikasan at pangkalusugan.

Dahil nakita nilang epektibo ang panga­nga­laga ng mga halaman dito, naging daan ito hindi lamang upang tumaas ang kamalayan sa benepisyo ng iba’t ibang gulay at prutas kundi maitatak sa kabataan ang kahalaga­han ng masusustansiyang pagkain at maging aktibo at maalam sa pagtatanim nito.

Itinuturo sa mga estudyante na hindi la­mang pinagaganda ng gardening ang bawat sulok ng kanilang kampus. Sa halip, nakatu­tu­long din ito na maitaas ang personal na pag­papahalaga ng bawat isa sa ating kapaligiran at kalikasan.

Base sa mga obserbasyon ng mga naka­usap nating guro, narito ang mga pakina­bang para sa mga mag-aaral na dulot ng pagsasa­gawa ng school gardening:

• Oportunidad para magtulungan sa ma­raming paraan.

• Nagkakaroon ng pagkakataong matuto gamit ang multiple learning styles.

• Naitataguyod ang nutrisyon at ehersisyo.

• Naituturo ang pasensiya at responsibi­lidad.

• Nagdudulot ng positibong work ethics na kanilang mababaon sa paglaki.

• Oportunidad para makapag-ipon ang mga estudyante mula sa kanilang mga naibentang halaman.

• Maiging pagpapahalaga sa sarili.

• Mabuting relasyon tulad ng pagkakaisa at samahan sa isa’t isa.

• Tumataas ang marka sa achievement tests sa Science.

Upang maisakatuparan itong muli, nais buhayin ng Department of Education (DepEd) ang naging programa na unang naitatag noong 1995 na “School Inside a Garden” na nagla­layong maipalaganap ang environmental edu­cation sa elementarya at high school.

Malaking tulong ito sa pagpapalawak ng kaalaman, kasanayan at pagpapahalaga sa siyensiya na may kaugnayan sa panahon, klima at buhay ng mga hayop. Bukod dito, mas lalong nauunawaan ng mga estudyante ang mga aralin sa Mathematics, Technology and Liveli­hood Education, English at iba pa sa pama­magitan ng mga karanasang naiuugnay sa pangangalaga ng kapaligiran at pagpapaha­laga ng kanilang kalusugan.