African, timbog sa pekeng passport

DINAKIP ng Bureau of Immigration (BI) ang isang babaeng African national na nakatakda sanang umalis ng bansa gamit ang pekeng pasaporte.

Sa report ni BI Port Operations Chief Grifton Medina, inaresto nila ang 31-anyos na si Safae Hazot Medin Omran sa departure area ng Mactan International Airport sa Cebu City.

Pasakay na si Omran sa eroplano patungong Taipei, Taiwan na may rutang Vancouver, Canada nang ito’y maharang.

Ayon kay Medina, iginigiit ng suspek na siya ay Canadian citizen subalit, kalaunan ay umamin din sa tunay na nationality nito sa pamamagitan ng pagprisinta ng kanyang Eritrean passport.

Dito napag-alaman na nakuha ni Omran ang Canadian passport sa halagang 18,000 Saudi Riyals sa Riyadh, Saudi Arabia.

Pansamantalang nakapiit si Omran sa Immigration detention facility sa Bicutan, Taguig City na anumang araw ay ililipad pabalik sa kanyang bansa.