Residential-commercial area nasunog, 3 tigok

Malungkot na sasalubungin ang Pasko ng mga pamilya ng tatlong indibidwal na nasawi sa sunog na naganap sa isang residential-commercial area sa Novaliches, Quezon City.

Nagsimula ang pagliyab alas-2:54 ng madaling-araw ng Huwebes sa bahagi ng Damong Maliit, Bgy. Nagkaisang Nayon.

Nakilala ang mga biktima na sina Arcenia Amongo Ilalim, 82; Josie Camalig, 42, at isa pang nasa limang taong gulang.

Ayon sa Bureau of Fire Protection, sumiklab ang sunog habang nasa kalagitnaan ng pagtulog ang mga biktima.

Umabot sa ikatlong alarma ang sunog at naideklarang fire out alas-4:34 ng umaga.

Tinupok ng apoy ang walong commercial establishments at 3 residential units at nadamay din ang isang sasakyang nakaparada.

Patuloy pa ang imbestigasyon ng Quezon City Fire Department sa naturang insidente.