PULSO NG PINOY SA QATAR 9-BALL, MATIBAY, PA-SEMIS NA
NASAKSIHAN na naman ang tatag ng pulso ng bilyaristang Pinoy nang daigin ni Carlo Biado ang mga katunggaling sina Wi Jiaqing ng China, 11-9 at Taiwanese Lin Wu Kun, 11-4, upang maipagpatuloy niya ang kanyang kampanya na mapanatili ang korona sa malupit na World 9-Ball Championships sa loob ng Al Arabi Sports Club ng Doha, Qatar.
Ang panalo ay nagtulak kay Biado, World Pool Billiards Association (WPA) no. 3 at World Games titlist, papunta sa semifinals kung saan makakaharap niya si 2015 at 2016 bridesmaid at Mosconi Cup hero na si Shane Van Boening ng USA.
Una rito, natakasan ni Biado ang upset-axe sa kanyang round of 32 na duwelo kontra kay Konrad Juszczyszyn ng Poland, 11-7, pati na rin sa pakikipagharap niya sa pambato ng Ukraine na si Vitaliy Patsura, 11-9, sa paligsahang naglalaan ng halagang $200,000 para sa mga makapapasok sa winners’ circle.
Sa pag-arangkada ng main draw kung saan 128 na manunumbok ang umeksena, sumikad sa preliminary stage si Biado sa pamamagitan ng pagdaig kina Argentinian Jorge Llanos, 9-3, at Sergey Lutsker ng Russia, 9-5.
Bukod kay Biado, tersera sa katatapos na All-Japan Billiards at sa Sen. Emmanuel Pacquiao 40th Birthday 10-Ball tilt wala nang iba pang Pinoy ang nakalagpas sa final 32. Nalaglag sa last 64 sina Alex Pagulayan at Jeffrey Ignacio habang tiklop sa last 32 sina Roland Garcia at Johann Gonzales Chua. Si Robbi Capito, isang 17-anyos na may dugong Pinoy pero kumakatawan sa Hongkong, ang nagpabagsak sa pinakamatikas na bilyarista sa buong mundo na si Albanian Eklent Kasi sa round of 32 però natigpas din siya sa bakbakan sa last 16.
Kasama sa mga bigating bilyarista na may pag-asa pang makapasok sa finals ang Aleman na si Joshua Fuller at WPA no. 12 at Greek gem na si Alexandros Kazakis.
Comments