Anti o pro-Duterte, dilawan o pulahan | Lahat ng Pinoy, dapat magdiwang sa pagbabalik ng Balangiga B

BOBI TIGLAO / BANAT

ANG pagkapanalo ni Miss Universe 2018 Catriona Gray at ang tagumpay ni Pangulong Rodrigo Duterte sa pagpapasauli ng Balangiga Bells ay maituturing na pagbibigay ng napa­kalaking karangalan sa ating mga Pilipino.

Tunay na maipagmamalaki bilang Pili­­pino ay ang tinatawag na nasyunalismo.

Lahat ng bansa sa buong mundo, lalo na sa Asya ay umunlad dahil napakalakas ng ka­nilang nasyunalismo.

Kapag may nasyunalismo ang mga tao sa isang bayan ay nagtutulungan sila at nagsa­sak­ripisyo para mapaunlad ang bansa.

Kung walang nasyunalismo ay kani-kanya lang ang mga tao o walang pakialam sa anu­mang mangyari sa bayan.

Eh, kung ganito ang maraming mamama­yan, tiyak na babagsak ang kanilang bayan.

Ang Balangiga Bells ay ang mga kam­pana sa Simbahan ng Balangiga sa Eastern Samar na kinuha ng mga sundalong Ame­rikano noong 1901 at iniuwi sa Estados Unidos bilang “war trophy” nila.

Ito ay matapos naghimagsikan ang mga Waray noon at napatay nila ang mahigit apat­napung sundalong Amerikano na sumakop sa kanila.

Gumanti ang mga Amerikano sa bayan ng Balangiga.

Iniutos umano ng heneral nila na pa­tayin ang lahat ng mga tao sa Samar na kayang humawak ng baril at sunugin lahat ang mga bahay doon.

Ayon sa mga mananaliksik, hindi 2,500 ang napatay ng mga Amerikano sa Samar kundi aabot pa umano sa 20,000.

Matapos ang karumal-dumal na krimen ay iniuwi nila ang tatlong kampana ng Ba­langiga para simbolo umano ng tagumpay nila laban sa mga Pilipino.

Mula noong 1957, may mga pagkilos na bawiin sa mga Amerikano ang mga kampa­nang ito, hindi lang dahil ninakaw ito kundi dahil simbolo umano ito ng pakikipaglaban ng mga Pilipino laban sa dayuhang sumakop sa kanila para maitayo ang ating bansa.

Si P-Duterte ang tanging pangulo na gi­nawang malaking isyu ang pagpapasauli sa mga kampanang ito sa ating bansa.

Sinabi niya noong Agosto na hindi niya kakausapin ang Amerikanong opisyal na may kung anu-anong programang gustong gawin hangga’t hindi nila ibinabalik ang mga kam­pana.

Nagwagi tayo nang maisauli ng mga Ame­riakano ang tatlong kampana noong Disyem­bre 15, 2018.

Ang tagumpay na tulad nito ang nagpapa­lakas ng ating nasyunalismo, ang pagma­mahal sa bayan.

Gayundin, ganito ang nagawa ni Catriona Gray sa pagkapanalo niya bilang Miss Uni­verse 2018 noong Diyembre 17, 2018 laban sa siyamnapu’t apat na mga kandidata.

Sa pagkapanalo niya, tayong mga Pili­pino ay sobrang proud at tunay na naging masaya bilang Pilipino.

Napatunayan ni Miss Universe 2018 Cat­riona Gray na tunay siyang Pilipino nang banggitin niya na tumutulong siya sa mga mahihirap sa Tondo, Manila.

Sinabi pa niyang kahit mahihirap ang mga tagarito ay may kagandahan sila sa pakiki­baka nila laban sa kahirapan.

Ang Tondo ay lugar na Pinoy na Pinoy. Isang libong taon na nang nakatayo ito at isa sa mga pinaka-popular na lugar sa Pilipinas.

Galit ka man kay P-Digong, dilawan o pulahan ka man, lahat tayong mga Pilipino ay dapat magkaisa at magdiwang sa tagum­pay ni P-Duterte sa pagbabalik ng mga kam­pana ng Balangiga at ang pagkapanalo ni Catriona Gray bilang Miss Universe 2018!