3 mandurukot sa Divisoria, Carriedo, Sta. Cruz at Baclaran, gumagala!
- BULGAR
- Dec 18, 2018
- 2 min read
ISANG linggo na lang at Pasko na kaya ang mga demonyong kamag-anak ni Taning ay sinasamantala ang mga kababayan nating nakatanggap na ng kanilang 13th month pay at bonus ay kanilang pineperhuwisyo.
Narito ang modus-operandi ng mga hinayupak na sina “Spotter”, “Player” at “Bakero” na namamayagpag sa Divisoria kung saan sa lugar na ito mo mabibili ang lahat ng kailangan na bukod sa mura na ay makapamimili ka pa ng gusto mo. Pero, kwidaw kayo mga ka-Bulgar dahil tatlong mga balasubas ang nakatakda kayong perhuwisyuhin ngayong kapaskuhan.
Si “Spotter” — siya ‘yung nagmamanman o naniniktik sa mga dumadayong mamimili at kanyang pinipigurahan ang posibleng mabiktima lalo na silang may kasamang bata o may kilik na paslit na abala sa pamimili ng bibilhin na kapag positive o madali nilang dukutan o laslasin ang bag nito ay agad niyang ititimbre kay “Player”.
Si “Player” — siya ‘yung magsasagawa ng karumal-dumal na operation kung saan susundan nito ang kaawa-awang biktima kahit saan ito pumunta. Tandaan n’yo mga suki na si Player ay isang batang lalaki na edad pito hanggang 15 na hindi mo iisiping isa itong mandurukot at kapag hindi nito madukutan ang biktima ay may dala itong blade na panlaslas nito sa bag ng biktima. At kapag nagtagumpay na sa kawalang-hiyaan ay ipapasa nito ang nakulimbat na gamit kay “Bakero”.
Si “Bakero” — siya naman ang magtatago ng mga gamit na ninakaw na pakikiramdaman nito kung gagawa o sisigaw ang biktima at isusumbong sa alagad ng batas ang nangyari sa kanya.
‘Yan ngayon ang mga raket o modus ng mga halang ang bituka na namamayagpag hindi lang sa Divisoria kundi sa Carriedo, Sta. Cruz, Manila at Baclaran sa Parañaque.
O, kayo riyan mga suki, ipinapayo ng inyong lingkod na mag-ingat, makiramdam, maging alerto kayo ngayong kapaskuhan dahil nakaabang ang mga buwitre sa inyong pupuntahan.
Ikaw kaibigan, anong sey mo?
Laging tatandaan, walang maloloko kung walang magpapaloko!
Ligtas ang may alam!
Kaya ikaw, ako, tayo… mag-ingat!
Comments