Ibinulgar sa Kamara | P550-M GOV‘T PROJECTS NAPUNTA SA IN-LAWS NI DIOKNO

HINDI bababa sa P550 milyong infrastructure projects ang natunton na may kaugnayan umano sa mga kamag-anak ni Budget Secretary Benjamin Diokno.

Tinukoy ni House Majority Floor Leader Rolando Andaya, Jr., ang hindi bababa sa apat na joint ventures ng Aremar Construction Corporation at CT Leoncio Construction and Trading.

Kabilang sa mga proyekto ang P49 million highway improvement ng Aruman-Casiguran Road; P96 million construction ng Barcelona-Casiguran diversion road; P115 million tourism road patungong Bulusan National Park at ang P289 million Daang Maharlika Section sa 1st District ng Sorsogon.

Ayon kay Andaya, ang Aremar Construction ay pagmamay-ari ni Maria Minez Hamor, ang anak ni Casiguran, Sorsogon Mayor Edwin Hamor. Napangasawa ng anak na babae ni Diokno ang anak ni Mayor Hamor na si Jojo Sicat.

Diin ng kongresista, lumalabas sa mga dokumentong nakalap nito na maituturing na pinaborang contractor ang CT Leoncio dahil sa joint venture nito sa Aremar Construction.

Nauna nang nabunyag na aabot sa 30 infrastructure projects ng gobyerno ang nakuha ng CT Leoncio Construction kahit na maituturing na sole proprietorship o ka-level lang ito ng isang sari-sari store.

“Nag-uumpisa pa lamang ang aming imbestigasyon. Ito pa lamang ang mga paunang datos na nakukuha namin. But this early, it is clear that, at least, P550 million infrastructure projects in Sorsogon found their way to the in-laws of Secretary Diokno. Hindi pa po kasama rito ang iba pang projects na nakuha rin ng Aremar Construction sa Sorsogon,” ani Andaya.