Bukod sa takaw-disgrasya at aksidente | Pangangaroling, labag sa batas?!
“THANK you, thank you ang babait ninyo, thank you!”, isa lang ito sa madalas na kinakanta ng mga bata kapag nakatanggap sila ng aginaldo sa pamamagitan ng pangangaroling.
Kaya lang, kasunod ng utos ni NCRPO Chief General Guillermo Eleazar na paigtingin ang Mendicancy Law o ang pagbabawal sa mga namamalimos at nagbibigay ng limos sa kalsada, karamihan sa kanila ay sumagot ng “bakit masama bang mamasko?” kaya ipinaliwanag sa kanila ang ipinagkaiba nito at kung ano ang dapat nilang maintindihan.
Gayunman, ayon sa mga eksperto, kung ang pamamasko o pangangaroling ay sapilitan at may koneksiyon sa mga sindikato, tiyak na lumalabag ito sa mga batas ng Mendicancy Law, Solicitation Law at Child Labor.
Samantala, dahil sa balitang labag sa batas ang pangangaroling, maraming mamamayan ang nagpahatid ng kani-kanilang saloobin.
Buwelta ng karamihan, kung ang pangangaroling ng kabataan ay hihigpitan o pagbabawalan, kulang na ang esensiya ng Pasko para sa ating mga Pinoy.
Sa katunayan, parte na ng ating tradisyon ang pamamasko sa pamamagitan ng pangangaroling, bagama’t, may perang pinag-uusapan dito, iba pa rin ang saya na kasama ang mga kaibigan na magbahay-bahay at kumanta ng iba’t ibang Christmas songs.
Samantala, mahigpit nating ipinaaalala sa lahat na upang maiwasan ang disgrasya sa pangangaroling, mainam kung gagabayan at sasamahan natin ang mga bata sa kanilang paglalakbay nang sa gayun ay hindi sila mapahamak ngayong kapaskuhan.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments