Leksiyon sa ‘killer lambanog’
TULUYAN nang ipinag-utos ng Food and Drug Administration (FDA) ang pagkumpiska sa mga lambanog na hindi rehistrado sa ahensiya.
Sa pinakahuling datos, umabot na sa 21 ang namatay ngayong taon dahil sa pag-inom ng lambanog dahil sa mataas na methanol content.
Sa nasabing bilang, 16 mula sa 44 na mga biktima ng pagkalason dahil sa pag-inom ng lambanog ang mula sa Bgy. Tambo, Capas, Tarlac kung saan 4 sa kanila ang agad na namatay matapos uminom ng lambanog noong November 19.
Lima naman ang nalason sa Bgy. Pooc, Santa Rosa, Laguna kung saan 3 sa mga ito ang nasawi noong December 5. Apat naman ang naitala sa MHA Site 3, Bgy. Sto. Tomas, Calauan City, Laguna, 3 rin ang namatay.
Tatlong kaso naman sa Sitio Buhanginan Tagbak, Bgy. San Jose, Antipolo City, Rizal at Interior Bala St., Bgy. San Diego, Luisiana, Laguna kung saan nakapagtala ng tig-2 nasawi.
Gayundin, 10 kaso sa Novaliches, Quezon City, 4 ang patay habang 3 ang namatay dahil sa pag-inom ng lambanog sa Bgy. Sucol, Calamba City, Laguna. Sa rami ng mga nasawi, dapat talagang ma-monitor ang mga hindi rehistradong lambanog na nasa merkado.
Hindi lang lambanog, anumang produkto na hindi dumaan sa pagsusuri ng FDA na maaaring delikado sa kalusugan ay dapat nang suyurin.
Walang masama sa pagnenegosyo, maliit o malaki man ang puhunan pero dapat tayong maging responsable. Palagi nating isaalang-alang ang kapakanan ng mga mamimili.
Comments