Pera, gamit tinangay | MAG-ASAWA TODAS SA 2 KAPITBAHAY

KAPWA nasawi ang mag-asawa makaraan silang pagsasaksakin ng da­lawang lalaking kanilang ka­pitbahay sa Dalaguete, Cebu.

Dead-on-the-spot sa loob ng kanilang bahay sa Bgy. Langkas sina Servando Ramos, 57, at Ana Maria Grace, 47, sanhi ng mga tama ng saksak sa iba’t ibang bahagi ng kanilang katawan.

Ginagamot naman sa ospital ang 12-anyos na anak nilang babae nang ata­kehin din ito ng mga suspek.

Tinutugis na ang magti­yuhing suspek sa krimen na nakilalang sina Antonio at Alejandro Ja­bagat.

Batay sa pahayag ng anak na survivor, kumatok ang mga suspek sa kanilang bahay alas-8:00 ng gabi.

Pinapasok umano ng mga magulang ang mga suspek subalit, nakarinig na lamang siya ng sigaw.

Laking-gulat na lamang at na-shock sa kanyang na­saksihan na pinagtulungang saksakin ng magtiyuhin ang kanyang ama at ina kung saan maging siya ay inatake rin ng saksak na tumama sa kanyang pisngi.

May posibilidad umano na pagnanakaw ang motibo sa pagpatay sa mag-asawa dahil tinangay ng mga sus­pek ang sling bag ni Servando na may lamang P80,000 bu­kod pa sa ilang mamahaling ga­mit.