6,000 OFWs may HIV-AIDS

PUMALO sa kabuuang 6,135 overseas Filipino workers (OFWs) ang may HIV-AIDS mula noong 1984 hanggang Disyembre ng kasalukuyang taon.

Ayon sa ACT-OFW Partylist, sa nasabing bilang, 86% o 5,280 ay mga lalaki.

Mayorya umano ng kaso ng mga lalaking OFW na may HIV-AIDs ay nakuha mula sa sexual contact sa kapwa lalaki na nasa 71% o 2,176 habang nasa 1,586 naman ay nakuha sa sexual contact sa lalaki at babae.

Batay sa National HIV/AIDS Registry, pumalo sa 59,135 kumpirmadong kaso ang mga Pilipinong nagpositibo sa HIV-AIDS.

Kasabay nito, iginiit ng partylist group na palakasin pa ng gobyerno ang kampanya at gamutan laban dito.

Kinalampag din nito ang POEA at OWWA na paigtingin pa ang preventive education sa HIV-AIDs sa mga OFW at sa mga pamilya ng mga ito.

Batay sa DOH, aabot lamang sa kalahati ng kabuuang bilang ng mga Pilipinong may HIV-AIDS o nasa 31,458 lamang ang sumasailalim sa antiretroviral treatment.