Kaalaman tungkol sa puberty stage

SHANE M. LUDOVICE, M.D / SABI NI DOC

Dear Doc. Shane,

Ako ay may 2 anak na edad 13 at 15. Napansin kong may ilang pagba­bago sa hubog ng kanilang katawan, sa boses at nag­ka­karoon na ng manipis na bigote. Ang anak kong babae ay dinatnan na ng regla. Gusto kong mala­man kung ito ba ang simula ng adolescence period? — Avelina

Sagot

Ang panahon ng adolescence ay bahagi sa buhay ng tao. Sa puntong ito naga­ganap ang pinakamalaki at pinakamabilis na mga pagbabago sa maraming aspeto ng pagkatao. Ang mga pagbabagong ito ay napa­kahalaga at tiyak na ma­kaaapekto sa buhay ng bawat indibidwal at sa pakikitungo nito sa lipunan na kanyang ginagalawan. Gayundin, sa panahong ito, pinakamabilis na nahuhubog ang personalidad, kakayahan, kaalaman at pag-angkop sa mga kaganapang emosyunal.

Walang espesipikong panahon kung kailan ito magaganap sa pagkatao ng bawat indibidwal. Ang pa­nahon ng mga pagbabagong pisikal, emosyunal, seksuwal at iba pang aspeto ay naiiba-iba. Isa sa mahahalagang pagbabagong nagaganap sa adolescence period ay ang pagbabago sa hubog ng pangangatawan ng indibidwal mula sa pagiging bata patungo sa panahon ng pagbibinata o pagdadalaga.

Narito ang mga pagba­bagong-pisikal na maaari nilang maranasan:

• Pagtubo ng mga buhok sa ilang bahagi ng katawan tulad ng kilikili at mukha, partikular sa kalalakihan at sa maseselang bahagi ng katawan sa parehong kasarian.

• Mabilis na pagtangkad, paglapad ng mga balikat sa kalalakihan at balakang sa kababaihan.

• Paglalim ng boses ng kalalakihan.

• Paglaki ng dibdib ng kababaihan.

• Pagsisimula ng menstrual cycle o buwanang dalaw sa kababaihan.

Ang mga pagbabagong ito ay dulot ng pagtaas ng lebel ng hormones — testoserone sa mga lalaki at estrogen sa mga babae.