Patay na beybi itinapon, estudyanteng mommy, huli

ISINASAILALIM nga­yon sa interogasyon ng Ma­nila Police District (MPD) ang isang 18-anyos na estud­yante na nahagip ng closed circuit television (CCTV) ha­bang itinatapon sa basura­han ang isang patay na sang­gol, kahapon ng umaga sa Sampaloc, Manila.

Nasa kustodiya ng MPD - Homicide Section si Che­che, hindi tunay na pangalan, dalagang estudyante na si­na­sabing mag-isa lamang nang isagawa ang pagtatapon ng sarili niyang anak.

Batay sa ulat ni SPO2 Bernardo Cayabyab, may ha­wak na kaso ng MPD-HS, alas-9:10 ng umaga, nang na­hagip ng CCTV, ang suspek na nag-iwan ng asul na plas­tic bag sa tambak ng basura sa panulukan ng M.F. Jhoc­son St., sa Sampaloc.

Nadaanan at nasaksihan ng concerned citizen ang kaduda-dudang pagtatapon ng suspek ng plastik kaya nang tiningnan niya ito ay na­­tuklasan niyang isang sang­gol ang laman ng plastik kung saan agad niya itong ini-re­port sa pulisya.

Sinabi ng suspek na mag-isa lang siya sa boarding house at alas-3:00 nang ma­daling-araw kahapon nang siya ay magsilang ng sanggol at buhay pa umano ito hang­gang sa mawalan siya ng malay at hindi na namalayan ang pangyayari at nang ma­gising ay nakita niyang hin­di na humihinga ang sanggol.

Nataranta na umano ang suspek sa nangyayari kaya naisipan nito na itapon na la­­mang ang sanggol. Kinum­pirma ng suspek na walang alam ang kanyang mga magu­lang sa kanyang pagbubuntis.

Ayon kay Cayabyab ka­ila­ngan pa nila ang sertipi­kasyon ng doktor upang ma­tukoy kung nagkaroon ng in­tentional abortion upang maisampa ang kaso laban sa suspek.