Sori na lang sa mga fans… JAKE, TODO-TAGO SA DETALYE NG KASAL NILA NG GF

Vinia Vivar / FRANKLY SPEAKING

AYAW nang magbigay pa ng detalye ni Jake Zyrus tungkol sa magaganap na kasalan nila ng girlfriend na si Shyre Aquino. As we all know, laman ng mga balita ngayon na engaged na ang singer pero ayaw na rin niyang idetalye pa kung paano siya nag-propose.

“Sa amin na lang ‘yun,” sabi ni Jake nang makatsikahan kahapon ng entertainment press sa mediacon ng The Biggest Charity Music Festival of the Year produced ng Frontrow.

“Okay na po kami na alam ng mga tao na we’re engaged, pero ‘yung mga details, since sa book pa lang, ‘yung buong buhay ko, parang nandu’n na, so this part of our lives, parang gusto namin ni Shy, sa amin na lang.

“I mean, of course, ‘pag nan­diyan na ang wedding, malalaman naman, sasabihin naman. Pero ‘yung mga details, okay na po na sa amin na lang,” he said.

Pero aminado si Jake na tala­gang iba ang feeling ng engaged at dream come true raw talaga ito for him.

“Dream come true. Kasi, bata pa ako, I’ve always dreamed of having my own family and being with someone na hindi lang mahal ka, naiintindihan ka, sinusuportahan ka sa lahat ng bagay. Kumbaga, give and take, alam mo ‘yun?

“Love is of course, two-way street and that’s exactly what is happening in our relationship, so perfect. I mean, perfectly perfect talaga,” pahayag ni Jake.

Sure na sure na raw siyang si Shyre na ang babaeng gusto niyang makasama habambuhay at sobrang happy daw siya ngayon.

Pero nilinaw niya na hindi na­man mangyayari ang kasal this year.

Samantala, thankful si Jake na na-invite siya ni RS Francisco (may-ari ng Frontrow) para sa napakalaking charitable music­fest na ito.

“I’m very excited but first of all, I just want to say thank you. This is really close to my heart because it’s always been a dream of mine to help other people and when they told me na – of course, aside from the great show that’s going to happen – ‘yung reason while we’re doing it, that really captured my heart.

“And of course, aside from singing, sabi ko nga, gusto ko talaga ‘yung tumutulong, so thank you so much for this opportunity of putting me on the show and everything,” sabi ni Jake.

Bukod kay Jake ay kasama rin sa The Biggest Charity Music Festival of the Year ang iba pang biggest names in the music industry tulad nina Ely Buendia, Parokya ni Edgar, Billy Crawford, Gloc 9, Callalily, Andrew E., Spongecola at marami pang iba.

Gaganapin ang music festival on Dec. 16 sa Mall of Asia Concert Grounds at ang proceeds nito ay mapupunta sa 28 charitable institutions.

Kahapon sa presscon ay inanunsiyo rin nina RS at Sam Versoza na mga founders ng Frontrow ang latest venture nilang Frontrow Cares na naglalayong makatulong sa iba’t ibang charitable institutions and organizations.