Deaf tour guides sa historical sites, aprub—DOT

MAGKAKAROON na rin ng mga deaf tour guide sa mga historical site sa bansa.

Ito ay matapos bigyan ng akreditasyon ng Department of Tourism (DOT) ang ilang deaf tour guides para tumulong sa pag-asiste sa mga turistang may espesyal na pangangailangan.

Paliwanag ni Tourism Secretary Bernadette Romulo-Puyat, ang pagkakaroon ng tour guides na may kaalaman sa sign language at nakauunawa sa pangangailangan ng persons with disabilities (PWDs) ay kailangan upang matugunan ang kanilang kampanya na barrier-free tourism.

Ilan sa mga kinahaharap aniya nilang problema sa DOT ay kawalan ng service providers na makikipag-communicate sa mga dayuhan na may kapansanan.

Ang pilot tour na pinangunahan ng 13 tour guides na may problema sa pandinig ay ginanap sa Rizal Park, National Museum at Fort Santiago.

Ang kanilang unang assignment, bigyan ng memorable trip ang 30 estudyante mula sa Philippine School for the Deaf (PSD).

Nabatid na may 27 iba pang aspiring special tour guides ang nakapasa sa DOT-training.