Umiwas sa kasalubong, sapol | LALAKI PISAK SA 18-WHEELER TRUCK

PATAY ang 26-anyos na office staff matapos mahagip at magulungan ng 18-wheeler truck sa Caloocan City, kamakalawa ng gabi.

Isinugod ng Caloocan City Ambulance Rescue Team sa Caloocan City Medical Center ang biktimang si Alexander Santos, ng Ruby Ville Subd., Baesa subalit, hindi na ito umabot nang buhay sanhi ng tinamong mga pinsala sa ulo at katawan.

Ayon kay Executive Officer Lito Cruz ng Bgy. 161, alas-6:58 ng gabi, naglalakad ang biktima sa kahabaan ng Reparo Road nang umiwas sa isa niyang makakasalubong patungo sa kalsada at hindi niya namalayan na may hilang mahabang trailer ang tractor head kaya nahagip ng gulong ang kanyang paa hanggang sa bahagyang makaladkad at magulungan ang ulo at bahagi ng katawan nito.

Nakayuko umano at may kinukuhang barya sa hawak na coin purse ang biktima kaya hindi niya namalayan ang trailer truck nang iwasan ang makakasalubong niya sa paglakad.

Sumuko naman ang driver ng truck sa pulisya na hindi na pinangalanan.