Paggawa ng iligal na aktibidad ng mga banyaga sa bansa, imbestigahan!
TUMAAS ang bilang ng mga manggagawang Intsik sa bansa kaya marami ang nababahala sapagkat naaagawan na umano ng trabaho ng mga ito ang mga empleyadong Pilipino.
Gayunman, tiniyak ni Labor Usec. Ciriaco Lagunsad III na magiging masusi sila sa pagkalap ng impormasyon hinggil sa dumaraming undocumented Chinese workers.
Kung saan nagsasagawa na sila ng paraan upang matunton ang mga banyagang walang sapat na work permits.
Samantala, nakalulungkot isipin na ginagamit ng mga dayuhan ang bansa natin para sa mga iligal na aktibidad, ‘yung hindi pa nga natin nasosolusyunan ang sarili nating mga suliranin, dumagdag pa sila sa iisipin.
Sa totoo lang, hindi natin ipinagdaramot ang Pilipinas sa kanila kaya lang kung katiwalian lang ang gagawin nila, ‘yun ang hindi natin hahayaang magpatuloy.
Sa ngayon, kulang na kulang ang oportunidad na trabaho rito sa bansa, dagdag pa na maraming pasaway at palpak na serbisyo ang sinusolusyunan pa ng gobyerno.
Kaya ang panawagan natin sa pamahalaan para maiwasang maisahan, huwag natin hahayaang halos masakop na tayo ng ibang nasyon, maghigpit kung kinakailangan, lalo na sa panahon ngayon!
At para makasigurado, tama lang na puntahan ang mga kumpanyang pinagtatrabahuhan ng mga banyaga, gayundin dapat na magsagawa nang masusing imbestigasyon ang Department of Labor and Employment (DOLE) at Bureau of Immigration (BI) sa loob ng mga ahensiya!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments