Kasama ang 2 babae | PULIS NIRATRAT, TODAS

TINAMBANGAN ang isang retired police ma­jor nang pagbabarilin ng riding-in-tandem kahapon sa Pasay City.

Naitakbo pa sa San Juan de Dios Hospital si retired Police Chief Inspector Ro­berto Razon, 52, ng Metro Real, Montalban, Rizal.

Hindi naman tinamaan ng bala ang dalawang baba­eng sakay nito na nakilalang sina Menchie Ramos at Flo­rabelle Legazpi, kapwa nasa hustong gulang.

Nagsasagawa na ng fol­low-up operation ang pu­lisya para sa pagkaka­kilan­lan ng mga suspek.

Sa inisyal na ulat ni Pa­say City Police Chief Sr. Supt. Noel Flores, nangyari ang pananambang alas-12:09 ka­hapon ng tanghali sa panulukan ng Diokno Boulevard at Parkway St.

Kagagaling lamang mag-inspeksiyon ng biktima sa mga security guard ng So­laire Hotel and Casino ha­bang binabay­bay nito ang naturang lugar na mina­maneho ang itim na To­yota Vios lulan sina Ramos at Le­gazpi nang sumulpot ang isang motorsiklo na hindi naplakahan.

Isa sa mga suspek ang bumunot ng baril at pinag­babaril ang kotse ng biktima saka tumakas.

Tinamaan ang nabang­git na biktima dahilan upang isu­­god sa nabanggit na ospital pero binawian din ito ng buhay.

Isa sa sinisilip na motibo ay negosyo nitong secu­rity agency na hindi muna bi­nang­git ang pangalan.