Dagdag-buwis sa alak, umusad na

PINAGTIBAY na sa ikalawang pagbasa ng Ka­mara ang panukalang mag­tataas ng buwis sa alak o mga produktong alkohol.

Ayon sa House Bill 8618, tataasan ng P6.60 ang buwis sa distilled spi­rits simula sa Enero 2019. Mula ‘yan sa ka­sa­lukuyang P22.40 na iti­na­takda ng Republic Act 10351.

Magpapataw din ng 22% na ad valorem rate sa distilled spirits habang ang specific tax rates ay P30.45 simula 2019 hang­gang 2022.

Ang buwis ay depen­de sa taas ng lebel ng al­cohol content sa kada litro. Pagsapit naman ng taong 2023, itataas pa ng 7% ang buwis.

Para naman sa spark­ling wines, magiging P650 na ang unitary rate ng buwis, pero may kaakibat na ad valorem tax na 15% at daragdagan ito ng 7% sa taong 2023.

Samantala, ang buwis sa still at carbonated wines na mas mababa sa 14% ang al­cohol content ay tataasan ng P2.10 mula sa kasaluku­yang P37.90.

Kung mas mataas sa 14% ang alcohol content ay tataasan ng P4.10 ang buwis simula sa susunod na taon at itataas ng 7% taun-taon makalipas ang 2019.

Ang fermented liquor naman ay magiging P28 na ang buwis mula sa kasa­lukuyang P25.40.