BIADO, UMARIBA PA SA Q-FINAL NG ALL-JAPAN 10-BALL C’SHIPS

NANATILING na­kataas ang bandila ng Pili­pinas matapos na maka­sibad papuntang quarter­finals si Carlo Biado sa World Pool Billiards As­sociation (WPA) rated na 2018 All Japan 10-Ball Billiards Championships sa Archaic Hall ng Ama­gasaki-city, Hyogo, Ja­pan.

Ibinasura ni Biado, world 9-ball king at WPA no. 3, ang pambato ng pu­nong abala na si Hideki Yamakawa, 11-1, upang makuha ang isa sa mga final 8 na mga upuan at magpatuloy ang paglalak­bay sa paligsahang mag­kakaloob ng JPY 6,316,000 (USD 56,780) sa mga bilyaristang mapapabi­lang sa winners’ circle.

Kasama sa mga gi­nawang tuntungan ni Biado sa pananatili sa torneo sina Liu Cheng Chieh ng Taiwan (11-0) sa last 32; Tasuku Nishio mula sa Japan (11-2) noong last 64; Mathew Edwards ng New Zealand (9-1) sa prelim at Hsu Jui An mula pa rin sa Taiwan (9-6) noong qualifying stage.

Mula sa pito-kataong pulutong ng Pilipinas, halos nasimot ang pag-asa ng bansa sa torneong magbibigay ng cham­pion’s purse na JPY 1,800,000 (US$16,185). Kasama sa mga naobli­gang mag-alsabalutan sina 2017 All Japan Championship king at WPA no. 9 Johann Gon­zales Chua, 2017 World 9-Ball runner-up at WPA no. 10 Roland Garcia, 2017 World 14.1 Straight­pool champion Lee Van Corteza, Jeffrey De Luna, Jeffrey Ignacio, ang Ce­buanong si Warren “The Warrior” Kiamco at si Ramil Gallego.

Nag-empake na rin nang masilat ang ibang mga bigating bilyarista tulad nina Mika Immo­nen ng Finland, German ace Thorsten Hohmann, WPA no. 3 Chang Jung Lin ng Taiwan at WPA no. 15 Japanese Naoyuki Oi.