Babala sa madalas na malakas ang regla!
Dear Doc. Shane,
Ako ay 46 years old at may 5 anak, problema ko ang aking malakas na regla at madalas ito. Ito na ba ang senyales na malapit na akong mag-menopause? —Adoracion
Sagot
Ayon sa mga gynecologist, mali ang paniniwala ng ilang kababaihan na ang malakas at madalas na pagkakaroon ng regla habang nagkakaedad ay sintomas ng “menopause” o ang yugto ng permanenteng paghinto ng regla ng babae.
Gayundin, habang papalapit na ang pagme-menopause ng babae, dapat ay “humihina at kumokonti” ang pagkakaroon nito ng regla at hindi papalakas at dumadalas.
Madalas, ang pagkakaroon ng regla habang nagkakaedad ay maaaring sintomas ng abnormal uterine bleeding o pagdurugo ng matris.
Maituturing lamang na menopause na ang babae kapag lumipas ang isang taon na hindi siya nagkakaroon ng regla. Karaniwan na sa kababaihang na makaranas ng menopause sa edad 50 at 51. Sa edad 45, nangyayari ang “perimenopause” o ang pagbabago ng kalagayan bago mag-menopause.
Gayunman, mainam kung magpakonsulta agad sa doktor ang babae kapag siya ay dinugo kahit nag-menopause na ito o lumipas na ang isang taong hindi nagkakaroon ng regla.
Comments