Self-medication, tinutulan ng DOH!
SA panahon ngayon, marami na ang nagkakasakit kaya lang dahil sa hirap ng buhay, mas pinipili ng ilan na mag-self-medication na lamang.
Gayunman, bukod sa hindi ito tino-tolerate ng Department of Health (DOH), sinabi ni Health Secretary Francisco Duque na ang pag-inom ng mga gamot na hindi inireseta ng doktor ay maaaring mauwi sa “antimicrobial resistance”.
Samantala, madaling sabihin na huwag gawin ang self-medication pero, mahirap itong sundin kung wala kang sapat na pera na pampa-check-up sa mga ospital, lalo na at hindi biro ang presyo ng mga gamot sa kasalukuyan kahit na may generic medicines, hindi tayo sigurado kung gaano ito kaepektibo.
Kaya ang panawagan natin sa mga kinauukulan, tulungan ang mga mamamayang walang kakayahang magpagamot at kung kinakailangang magdagdag o i-improve ang pagtatayo ng mga health center, gawin!
Marami kasi ngayong health centers na imbes mapakinabangan ng marami ay nagiging tambayan at haunted center, kulang sa serbisyo at gamot.
Paalala para sa lahat na kahit marami tayong mga pinagdaraanan, dapat ang kalusugan ay palagi nating pag-ingatan!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments