Magkarelasyon para maraming mapagpilian | CONG., AT GOB. PAYAGAN DING MAGKASAL

ITINUTULAK sa Ma­babang Kapulungan ng Kongreso ang panuka­lang naglalayong ma­bigyan ng awtorisasyon ang mga kongresista, gayundin ang mga gobernador na magkasal.

Isinalang na sa deliberasyon ng House Committee on Revision of Laws ang House Bill 5699 na layong mare­paso ang Family Code para maisama ang mga kongresista at gober­nador sa listahan ng mga pinapayagang magka­sal.

Sa kasalukuyang sistema, mga alkalde, miyembro ng Hudika­tura, pari o rabbi ang pinahihintulutan ng batas na magbasbas ng kasal.

May mga pagkaka­taon na nabibigyan din ng awtorisasyon na magkasal ang kapitan ng barko at eroplano, consul, vice-consul at commander ng Armed Forces of the Philippines (AFP).

Ikinakatwiran sa panukalang-batas na napapanahong maiha­nay na rin ang mga kongre­sista at gobernador sa mga pupuwedeng mag­ka­sal upang maraming mapagpilian ang mga magkarelasyon sa kung kanino sila kukuha ng basbas.

Tinukoy din sa pa­nukala ang dumaraming bilang ng mga may common-law relationship o live-in o nagsasama nang hindi kasal.

Sa kabila nito, hindi pa malinaw sa panukala kung limitado lamang sa mga district solon o kasama ang mga partylist representative sa maaaring magkasal.