TIGRESSES, TINIGBAK SA PLAYOFFS ANG ARCHERS

PINANGUNAHAN ng Season MVP na si Grace Irebu ang University of Santo Tomas sa pagpapatalsik sa De La Salle University, 79-68 kahapon sa kanilang playoff match sa UAAP Season 81 Women’s Basketball Tournament sa Araneta Coliseum.

Kapwa nagtapos na may markang 8-6, panalo-talo sa nakaraang elimination round, pinag-agawan ng Tigresses at Lady Archers ang huling slot sa stepladder semis. “It was a well-fought game. Knockout e. Thanks to La Salle for making us a better team this season,” pahayag ni UST head coach Haydee Ong. “The competition was very tight. I’m happy with the resiliency of the girls. They did not give up after we were down 11-0. They just kept on fighting.” Ibinangon ni Irebu ang Tigresses buhat sa 0-11, pagkakaiwan sa simula ng laban nang ipasok siya ng coach mula sa bench matapos ‘di ibilang sa starters.

Nagtala si Irebu ng 29 puntos, 14 rebounds, at 4 blocks kasunod si Larosa ng 18 puntos kasunod si Tin Capilit na may 16 para sa Tigresses habang nanguna si Castillo at Claro para sa DLSU na may 20 puntos at 15 puntos ayon sa pagkakasunod.

Sa isa pang laban, inangkin ng FEU ang ikalawang puwesto nang talunin ang Adamson, 69-63 sa playoff match. Maghaharap ang Lady Falcons at ang Tigresses para sa tsansang makaduwelo ang FEU. (VA)