Iwas-krimen at bawas pangamba para sa lahat ng motorista | Plaka ng motorsiklo, palalakihan na!
MATATANDAANG, kaliwa’t kanang krimen na ang nangyari rito sa bansa na kinasasangkutan ng mga riding-in-tandem, kaya naman upang masolusyunan ito, sa ilalim ng House Bill 8419, inatasan ang Land Transportation Office (LTO) na lakihan ang plate number ng mga motorsiklo nang sa gayun ay makaiwas tayo sa iba’t ibang klase ng krimen, partikular na ang riding-in-tandem.
Gayunman, naniniwala ang mga kinauukulan na malaki ang maitutulong nito para kahit paano ay mabawasan na ang mga pasaway na patuloy na ginagamit ang kanilang motorsiklo para lamang makapambiktima ng kanilang kapwa.
Sa katunayan, dahil sa sobrang takot ng ilan nating mga kababayan, nagkaroon ng viral video hinggil sa dalawang taong naka-helmet na nakasakay sa motorsiklo kung saan nagsitakbuhan ang mga tao kahit hindi naman riding-in-tandem ang kanilang nakaengkuwentro.
Sadyang nag-iwan na ito ng takot at pangamba sa lahat at ‘yun ang dapat nating baguhin!
Ngayon, kung masisimulan na ang pagpapalaki ng mga plaka, mas madaling mahahanap o mahuhuli ang mga taong sangkot sa riding-in-tandem at marami pang iba.
Gayundin, bukod sa masisigurado ang kaligtasan ng lahat, mababawasan pa ang pangamba nila dahil sa mga kawatan.
Samantala, LTO na ang bahala sa nararapat na laki ng plaka, pero dapat ay nakikita ang alphanumeric characters kahit pa sa distansiyang labindalawang metro, kapag naman nasira o nawala ito, mainam na makipag-ugnayan kaagad sa LTO.
Ang hindi susunod sa panukala ay pagmumultahin ng P5, 000 hanggang P100, 000.
Kaya ang panawagan natin sa lahat, mag-ingat at suportahan ang panukala!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments