WPC FINALISTS NGAYON NA, USAPANG SPORTS NG TOPS

ANG natitira pang maka­kapasok sa kampeonato ng 2018 World Pitmasters Cup (Master Breeders Edition-2) 9-Stag International Derby ay malalaman ngayon sa paglalatag ng ikatlong araw ng semis sa Newport Perfor­ming Arts Theatre of Resorts World simula alas-12 ng tanghali at nakalinya ang 122 sultada.

Napatunayan ang ma­tinding labanan sa semis ma­tapos na walang makabuo ng 5 puntos sa unang 3-stag semis noong Lunes.

Ang GS Señor 3 ni Barry Crisostomo ay nakakuha ng pinakamataas na iskor na 4.5 puntos samantalang naka-4 na puntos siya sa isa pa niyang lahok na GS Señor 2.

May tig-4 na puntos din ang Tiger Shark/Philreca PDJ (Engr. Celso A. Sala­zar), Har-Sy-Tan Ang Babae Sa Mall (Harold De Ramos), P.E. Gamefarm 2 (Pol Es­trellado), Diego JCap Thor MP (Eric dela Rosa), Lucky Chard Tabuk JD (Atty. Tubban/Jun Durano), RJM Bohemian Rhapsody (RJ Mea) at Roosterville BS (EP/Boyet Singbengco)

Ang 4-stag finals para sa lahat ng may iskor na 3 or 3.5 puntos ay sa Nob. 23, sa­­­mantalang ang may tig-4, 4.5 o 5 puntos ay magtutuos para sa korona sa Nob. 25 grand finals.

Samantala, ang kauna-unahang “Usapang Sports” ng Tabloid Organization in Philippine Sports (TOPS) ay idaraos sa Huwebes (Nob. 22) kung saan si Phi­lippine Sports Commission Chairman William “Butch” Ramirez at Games and Amusement Board(GAB) Chairman Abraham “Ba­ham” Mitra ang mga es­pesyal na panauhin.

Idaraos ang weekly sports forum ng 10 a.m., sa National Press Club Bldg. sa Magallanes Drive, Intra­mu­ros.

Tatalakayin nina Ra­mirez at Mitra, ng local go­vernment sports agencies ng Office of the President ang maiinit na isyu sa local sports.

Babanggitin ni Ramirez ang partisipasyon ng PSC sa iba’t ibang sports activi­ties ngayong taon at sa 2019.

Pag-uusapan din ni Mitra ang katatapos na World Boxing Council (WBC) 3rd Women’s Con­vention and Asian Summit, na idinaos ng GAB noong Nob. 16-19. (MC)