56 distressed OFWs mula Saudi, balik-bansa na
NAKABALIK na sa bansa ang 56 distressed overseas Filipino workers (OFWs) mula sa Saudi Arabia.
Dumating ang mga OFW sa Ninoy Aquino International Airport (NAIA) na sinalubong ng ilang kinatawan ng Overseas Workers & Welfare Administration (OWWA) at Migrante International.
Napag-alaman sa ulat na ang mga bagong dating na Pinoy worker ay makatatanggap ng financial assistance mula sa pamahalaan upang magamit nila sa pagsisimula ng kanilang maliit na negosyo.
Nitong nakalipas na buwan, dumagsa rin ang iba’t ibang grupo ng Pinoy workers kung saan umabot sa kabuuang 1,470 OFWs na pawang naapektuhan ng pagsasara ng Azmeel Contracting Corporation.
Sa salaysay ng mga OFW, hindi sila nakatanggap ng limang buwang suweldo kaya naisipan ng iba sa kanila na magtinda ng iba’t ibang pagkakakitaan para sila mabuhay.
Tinulungan din sila ng kapwa Pinoy workers nang makarating sa kanilang kaalaman ang sinapit na kalbaryo ng mga manggagawang Pilipino roon.
Sa kabila nito, tiniyak naman ng pamahalaan na maililikas nila ang iba pang OFWs bago dumating ang kapaskuhan upang makapiling ang kani-kanilang mga mahal sa buhay.
Comments