Buking ng mister na parak | PULIS NA KABIT NG MISIS, NIRATRAT

TODAS ang isang pu­lis nang pagba­barilin ng kan­yang kabaro matapos si­lang dumalo sa isang programa sa loob ng National Capital Re­gional Police Of­fice (NCR­PO) kahapon ng umaga sa Taguig City.

Dead-on-arrival sa Ta­guig-Pateros District Hos­pital si PO1 Mark Carlo Pa­samba, 29, nakatalaga sa Mobile Force Company ng Regional Mobile Force Ba­­tallion (MFC-RMFB).

Nasa kustodiya na­man ng Taguig City Police ang suspek na si PO1 Carlos Al­berto Aljama, 31, nakatalaga sa Admin Holding Office ng RMFB matapos sumu­ko.

Base sa report na naka­rating kay NCRPO Director Guillermo Eleazar, nangyari ang pamamaril sa head­quarters sa 2nd St., Camp Bagong Diwa, Bgy., Bicutan Taguig City alas-8:30 ng umaga.

Napag-alaman na galing sa pagdalo ang biktima at suspek sa Police Informa­tion and Continuing Edu­cation (PICE) na inorganisa ng RMFB.

Nang matapos ang pro­grama, kinompronta umano ni PO1 Aljama si PO1 Pa­samba.

Nauwi ito sa pagbunot ng baril ni PO1 Aljama at pinagbabaril nito si PO1 Pa­samba, na agad naman isi­nugod ng kanilang rescue team sa nabanggit na ospi­tal, subalit, binawian din ito ng buhay.

Base sa teorya ng pu­lisya, posibleng love triangle ang motibo sa pamamaril.

Sinasabing naghinala umano ang suspek na may namamagitan umanong re­lasyon ang biktima at kan­yang misis na malaon na nitong kinikimkim.

Nagpapatuloy pa rin ang imbestigasyon hinggil sa nasabing insidente.