KIAMCO, NAGHARI SA VIRGINIA STATE 8-BALL

IPINAKITA ng Pinoy cue artist na si Warren “The Warrior” Kiamco ang ma­lupit na porma upang ma­kaakyat sa trono na walang talo nang magwakas ang 2018 Virginia State 8-Ball Championships sa Midlo­thian.

Rumatsada si Kiamco, tubong-Cebu at no. 31 sa AZBilliards Moneyboard ngayong 2018 dahil sa na­pagwagian nang mahigit $25,000, ng magkakasunod na mga panalo laban kina Reymart Lim (7-3), Chris­topher Wilburn (7-1), Eric Moore (7-3) at Cary Dunn (7-1) para makarating sa hotseat match taglay ang malinis na kartada. Naging topnotcher si Kiamco sa winner’s bracket nang ma­ungusan niya si Mike Davis Jr. sa iskor na 7-6.

Dahil sa pagkatalo, na­punta sa one-loss side si Davis. Dito, nagawa niyang patumbahin ang two-time Active Pool Tour winner na si Lim, 6-3, upang mahablot ang karapatang muling makasagupa si Kiamco para sa titulo.

Pero pagdating sa cham­pionship face-off nina Kiamco at Davis, hindi na napigilan ang arangkada ng Pinoy sa pagkuha niya ng korona sa paligsahang si­nusuportahan ng Diamond Billiards.

Ito na ang pangatlong kampeonato ni Kiamco ngayong 2018. Naghari rin dati ang Pinoy sa Andy Mer­cer Memorial 9-Ball (Marso, Las Vegas) at sa Freezer’s Icehouse 10-Ball Challenge (Hulyo, Arizona).

Pangalawang podium finish ni Kiamco sa Virgi­nia.

Noong Pebrero ngayong taong ito, sa larangan naman ng 10-Ball, nakuha ng bati­kang Pinoy ang runner-up honors sa likod ng Rusong si Ruslan Chinakhov.