Guilty sa graft | IMELDA MARCOS, NAGPIYANSA NG P150K

INATASAN ng Sandiganbayan si dating unang ginang at ngayon ay Ilocos Norte Representative Imelda Marcos na maglagak ng P150,000 bilang piyansa nito.

Ito ay para sa kanyang pansamantalang kalayaan matapos siyang mapang guilty sa pitong bilang ng kasong graft noong Nobyembre 9.

Hangga’t hindi naibabayad ang P150,000 na bail, hindi pinayagang umalis sa court premises si Marcos.

Sa pagharap sa pagdinig ng Anti-Graft Court sa kanyang inihaing motion for leave kahapon, sinabi ni Marcos na nabigo siyang dumalo sa promulgation ng kanyang kaso dahil hindi niya agad nalaman ang petsa nito. Nalaman lang umano niya na promulgation na pala ng kanyang kaso nang mapanood niya sa balita.

Maliban dito, sinabi ni Marcos na hindi rin maganda ang kanyang pakiramdam nang siya ay magising noong Biyernes.

Tinanong naman ni Sandiganbayan 5th Division Justice Rafael Lagos si Marcos kung bakit nakadalo ito sa birthday party ng anak.

Sagot naman ng dating unang ginang, umiyak at nagmakaawa sa kanya ang anak na si Ilocos Norte Gov. Imee Marcos para dumalo siya sa party.