Babala sa mahilig magsuot ng masikip na pantalon!
Dear Doc. Shane,
Ako ay tindera sa palengke, problema ko ang naglalakihan at masakit kong mga ugat sa binti. Ano ang maaari kong gawin o ipahid para maibsan ang sakit nito? — Cora
Sagot
Marami sa mga Pinoy ang may problema sa malalaking mga ugat sa paa at kamay. Bukod sa hindi ito magandang tingnan, minsan ay sumasakit pa.
Narito ang mga maaaring makatulong para hindi ito lumala:
Itaas ang mga kamay o paa — ang sanhi ng varicose veins ay ang pagluwag ng mga ugat. Kapag palaging nakababa ang mga paa, maiipon dito ang dugo at mamamaga ang ugat.
Magsuot ng support stockings o masikip na medyas — ang support stockings ang pinakamabisang lunas sa varicose veins kaya ipinapayo na gumamit nito.
Iwasang tumayo ng matagal — kung hindi ito maiiwasan sa trabaho maaaring galaw-galawin ang iyong paa habang nakatayo na parang nag-e-exercise upang umakyat ang dugo mula sa paa pabalik sa puso.
Itaas ang mga paa kapag matutulog — ipatong ang mga paa sa unan para mabawasan ang pag-iipon ng dugo rito.
Iwasang magsuot ng masikip na pantalon — puwedeng maipit ang ugat natin sa mga paa. Siguraduhing katamtaman lamang ang sikip para makadaloy ang dugo.
Kumain ng mga gulay na mataas sa fiber — tulad ng patola, pechay, okra at kangkong, gayundin, ang prutas tulad ng papaya at pinya. Sa tulong nito, magiging regular ang ating pagdumi. Kapag malambot ang ating dumi, makaiiwas tayo sa varicose veins.
Gayunman, hindi pinapayuhan na basta maniwala sa mga mamahaling gamot o pamahid para sa varicose veins kaya kung malaki o hindi na normal ang laki at masakit na ang inyong varicose veins, mainam na magpakonsulta na kayo agad sa doktor.
Comments