Search
  • BULGAR

Rico J. Puno, isang hindi malilimutang Filipino Music Icon, pramis!

IMEE R. MARCOS / BUKING!

BAGO pa ang Undas ay naging malungkot ang hanay ng mga nasa music industry dahil sa pagpanaw ng isa sa mga beteranong mang-aawit at kilala ring Filipino Music Icon na si Enrico ‘Rico’ J. Puno.

Naging makulay ang mundo ng industriya ng Philippine music dahil sa tulad ni RJP na hindi lang magaling kumanta kundi hinangaan din dahil sa kanyang pagiging ma­pagbiro at pagiging masayahin sa entablado sa tuwing siya ay nagpe-perform.

Hindi man siguro ganu’ng ka-popular sa mga millennial ang singer, imposibleng hindi nila kilala ang mga kantang pinasikat nito tulad ng “May Bukas Pa”, “Macho Gwapito”, “Magkasuyo Buong Gabi”, “Sorry na, Puwede Ba?” at marami pang iba.

Nakatatak na sa kamalayan ng maraming Pinoy, lalo na ‘yung mga mahihilig sa musika, ang kanyang mga kanta at siya na rin mismo. Hinangaan siya dahil sa maganda niyang boses na kapag narinig natin ay madali itong ma-identify dahil sa walang katulad ang boses nito.

Oo nga at mayroon ding mga isyu na hinarap si RJP (eh, sino bang wala?) tulad ng mga relasyong pinasok nito maging sa pagsabak niya sa politika at mga nakaalitan sa loob at labas ng showbiz industry, pero nalampasan niya ang lahat ng ito at nangibabaw pa rin kung ano siya bilang musikero at marahil dahil na rin sa mga naniniwala at humahanga sa kanyang pag-awit.

Gayundin, masasa­bing malaking pangalan ang iiwan ni RJP sa music industry dahil sa kanyang mga naging kontribusyon sa music at maging sa showbiz industries. Nakatatak na rito ang ganda ng kanyang boses, galing sa pagkanta at pagpapa­kuwela. Marami pang susulpot na magagaling na singer, maaaring may mas ma­galing pa sa kanya. Pero, iisa lang at bukod-tangi ang tulad ni Rico J. Puno.

0 comments

Disclaimer : The views and opinions expressed on this website or any comments found on any articles herein, are those of the authors or columnists alike, and do not necessarily reflect nor represent the views and opinions of the owner, the company, the management and the website.

RECOMMENDED
BULGAR LOGO

Bulgar Online.

Call us : (02) 995-3732

© 2021 bulgaronline

Sison's Publishing House, Inc.