GM TORRE, NILEKSIYUNAN SI GM CAMER SA 2018 ASIAN SENIOR CHAMPIONSHIP

TINURUAN ng leksyon ng nagtatanggol na kampeon at Pinoy Grandmaster Eugene Torre si Asian GM Angelito Camer ng Australia sa loob lang ng 19 na galaw sa pagsisimula ng 2018 Asian Seniors Chess Championship sa lungsod ng Tagaytay.

Kasama rin ni Torre, topseed sa torneo at may rating na 2449, sa grupo ng mga nakapagposte ng opening round na panalo sina International Master Petronio Roca ng Pilipinas, Indonesian FIDE Master Syarif Mahmud at ang mga untitled woodpushers na sina Than Khin ng Myanmar, Khazakstan bet Kuanishbek Jumadullayev at Rosendo Bandal mula pa rin sa Pilipinas.

Nangibabaw si Roca, 3rd ranked at may rating na 2376, kontra kay lady chesser at dating national team mainstay Milagros Emperado samantalang nanaig si Mahmud laban sa Pinoy na si Daniel Millare sa paligsahang umakit ng 34 Asian seniors chessers.

Si Mahmood Dodean ang nabiktima ng Myanmar ace na si Khin; hindi umubra si Candidate Master Tony Davis ng Australia sa husay ni Jumadullayev habang naging matikas naman si Bandal nang makasagupa si Malaysian gem Kian Hwa Lim.